Nailisi ni South Korean President Yoon Suk Yeol iti impeachment idi kalman gapu iti ababa a deklarasionna iti martial law, kalpasan a binoykot dagiti mamanday-linteg manipud iti agturturay a partidona ti butos iti laksid ti panagprotesta iti ruar ti parlamento.
Kinigtot ni Yoon iti nasion daytoy ken ti umili idi kalman ti rabii a rason ti pannakasdaawda babaen ti panangsuspindirna iti turay dagiti sibilian nga agpoprotesta iti ruar ken nangipatulod ti kameng dagiti militar iti parlamento.
Insingasing dagiti partido ti opisision ti mosion ti impeachment nu sadinno, kasapulan ti “two thirds majority votes” tapno maipasa, ngem naboykot babaen ti People Power Party (PPP) ni Yoon ken napaay a naipasa daytoy.
Sigun iti People Power Party (PPP), kayatda a liklikan ti nakaro a pannakabingbingay ken riribuk isut rason a nilappedanda ti impeachment kontra kenni Yoon.
Innayon pay ti dadaulo ti People Power Party (PPP) a daytoy ket tapno marisut ti krisis babaen iti naurnos ken responsable a wagas.
Ti resulta ti impeachment ket nangdismaya kadagiti dakkel a bunggoy — nga agarup iti 150,000 nga indibidual sigun kadagiti otoridad, maysa a milion sigun kadagiti organizer– nga agur-uray iti ruar ti parlamento para iti pannakaikkat ni Yoon.
Nagsinnaay ken nagsangit dagiti kaaduan nga indibidual nga agur-uray iti parlamento gapu iti pannakaupay dagitoy, bayat a rimmuar dagiti mamaglinteg iti agturturay a partido manipud iti National Assembly.
