BAGUIO CITY – Nangbukelen ti Police Regional Office – Cordillera (PROCOR) iti Special Investigation Task Group a mangimbestigar iti panakapapatay ni Lagayan, Abra Municipal Councilor Isagani Ambaoa Joson.
Iti eksklusibo nga interview ti Bombo Radyo-Baguio kenni PCI Carol Lacuata, information officer ti PROCOR, kinunana a nabukel ti nasao a task group tapno mapapartak ti pannakaduktal ti responsable iti nasao a pammatay ken ti motibo iti daytoy.
Kinunana a ti task group ket idauluan ni Deputy Regional Director for Operations PSSupt. Sterling Raymund Blanco ken agserbi kas co-chairman ni
Abra Police Provincial Director PSSupt. Wilson Soliba.
Innayonna a duktalen met laeng ti task group no naka-awat ti pangta iti biag ti biktima.
Maipalagip a napapatay ni Joson idi rabii ti Agosto 8 ken iti panagresponde dagiti otoridad ket nasarakan iti abay ti bangkay ti biktima ti caliber 45 pistol a mapapati a tagikua ti napapatay a konsehal.
Sigun kadagiti otoridad, nagsagrap ti biktima iti tama ti paltog iti likod daytoy a rimuar iti barukongna a nagresulta iti dagus nga ipupusay daytoy.
