Binilin ni Land Transportation Office (LTO) chief Vigor D. Mendoza II dagiti amin a regional directors a mangipatungpal dagitoy iti special operations kontra kadagiti kolorum a lugan ken siguradwenda ti visibility kadagiti amin a disso a pangilugluganan dagiti driver kadagiti pasaheroda.
Daytoy ket kasaruno metlaeng ti pammilin ni Department Transportation Secretary Giovanni Z. Lopez a tulungan ti nasao nga ahensya para iti panakapaksyat dagiti kolorum gapu kadagiti pakaseknan mainaig iti kinatalged dagiti pasahero.
Sigun kenni Mendoza, naglevel-up itan dagiti driver ken operator dagiti kolorum a lugan iti panangipatungpalda kadagiti iligal a trabaho ngem impanamnama daytoy nga agbalinda a one-step ahead kadagitoy.
Innayon ti opisyal a ti kaadda dagiti kolorum ket nakaro a makaap-apektar kadagiti lehitimo a transportasyon nu sadino, sigun kadagiti daduma a transport groups ket dumanon iti 30% ti mapukpukaw iti pamastrekanda tunggal aldaw gapu kadagiti kolorum.
Kagiddan dayta, inyunay-unay ti opisyal kadagiti komyuter wenno riding public a liklikanda nga i-patronize dagiti kolorum gapu iti saan a sigurado a road worthiness dagitoy kasta metten ti kinaawan iti insurance.
