Special traffic regulation iti Marcos Highway, partikular iti Badiwan, Tuba, Benguet, mangrugin inton July 8
BAGUIO CITY – Mangrugin inton July 8, aldaw ti Dominggo ti implementasyon ti nabukel a baro nga special traffic regulation iti Marcos Highway, partikular sadiay Badiwan, Tuba, Benguet.
Sigun kenni Agot Balanoy, panakabagi ti liga dagiti asosasyon iti La Trinidad Vegetable Trading Post, ti special traffic regulation iti nasao a paset ti kalsada ket resulta ti taripnongda iti Tuba Municipal Police Station.
Nailanad iti baro a regulasyon a no agtudo ket saan a mabalin a dumalyasat iti Marcos Highway dagiti truck a single-differential gaputa limitado ti kapasidad dagitoy a sumang-at iti nakadlis a kalsada ken nasken a maiyakar dagiti linaon dagitoy a perishable goods.
Kinunana a dagiti laeng trucks a triple-differential, airbag wenno center lock ti maipalubos a dumalyasat iti nasao a kalsada.
Maimuntar met ti checkpoints sadiay Rockshield wenno Poyopoy, Tuba ken makemmeg dagiti aglabsing iti katulagan.
Mabalbalakadan met dagiti trucks a naglaon iti chicken dung ken dadduma a nadagsen a karga nga agparada nga umuna iti aniaman nga staging area sakbay ti Badiwan agingga a sumardeng ti tudo tapnu maliklikan ti aniaman nga aksidente.
Limitado met iti 5kph agingga 30kph ti kapartak dagiti sumalsalog a lugan wenno trucks.
