BAGUIO CITY -Maipatungpal ita nga aldaw ti special vaccination rollout kadagiti amin nga stakeholders ti La Trinidad Vegetable Trading Post ken Benguet Agri-Pinoy and Trading Center (BAPTC).
Kasaruno daytoy ti kiddaw ti nasao a sektor iti lokal a gobierno ti La Trinidad kabayatan ti taripnong dagitoy itay nabiit.
Sigun kenni Municipal Health Officer Dr. Antonette Agpas, dumanon iti 1,800 a doses ti bakuna a Pfizer ti maipaay kadagiti stakeholders dagiti nasao nga trading areas.
Naituding a mabakunaan dagitoy iti uneg ti La Trinidad Trading Post area no sadino kasapulan nga isumitir dagiti stekeholders ti naganda ken dagiti empleyadoda iti municipal health office.
Maipalagip a kiniddaw dagiti dadaulo ti asosasyon dagiti mannalon a maipaayanda iti maysa a nga aldaw tapno mabakunaanda para iti seguridad dagitoy kontra iti virus
Maikonkonsidera met a narisgo a sektor dagiti mangmangged kadagiti trading areas gaputta kadawyan a makipulpulapol dagitoy kadagiti tattao.
Kabayatana, naduktalan iti panagadal ti National Inter Agency Task Force a kangrunaan a rason ti panagngato ti kaso ti COVID19 ti La Trinidad, Benguet ket ti nakapoy a panagtulnog iti paglintegan kadagiti trading areas sadiay.
Maibasar iti panagadal, nabigbig kas “super spreader sites” ti La Trinidad Vegetable Trading Post gapu iti maob-obserbaran a saan a panakasurot kadagiti minimum public health standards sadiay.
Gapu iti daytoy, posible a maisubli manen ti No Uniform,No Entry Policy iti nasao a trading area.
Maipalagip nga itay nabiit ket nagpositibo iti Delta variant ti maysa a trader sadiay kas maibasar iti sequencing nga impatungpal ti Philippine Genome Center.
Immuna metten nga inaklon dagiti maseknan nga otoridad nga agtaltalinaed a karit kadakuada ti implementasion dagiti paglintegan tapno malapdan ti panagwaras ti COVID19 kadagiti tradinga areas nangruna ta saan a makikokoordinar ti kaaduan iti populasion sadiay.
