BAGUIO CITY – Naragsakan ti Traffic Enforcement Unit ti Baguio City Police Office iti panagsubli ni SPO3 Alberto Tadeo ditoy siudad ti Baguio.
Segun kenni PSupt. Armando Gapuz, dadaulo ti nasao nga opisina, babaen iti daytoy ket adda ti agbalin a katulunganda iti panangiyimplementarda iti linteg trapiko ti siudad nangruna iti panakarambak ti Panagbenga.
Kinunana pay nga adalenda metlaeng no anya ti ‘assignment’ a maipaay keni SPO3 Tadeo.
Naamuan nga ita nga aldaw ti ‘first day of report’ daytoy iti nasao nga unit ken daytoy metlaeng ti nadutukan nga agbantay iti paset ti Leonard Wood Road.
Ni Tadeo ket maysa a ‘motorcycle cop’ sakbay daytoy a naiyakar sadiay probinsya ti Apayao ken naiyakar manen iti Regional Office- Cordillera kabayatan ti panakaimbestigar ti kaso daytoy.
Maipalagip a nagbalin a kontrobersiyal ti panakaiyakar ni Tadeo kalpasan ti panangsitar wenno panangpalagipna iti driver ni Deputy Director for Administration Police Senior Superintendent Gregorio Lim a naglabsing iti linteg-trapiko.
Inkalintegan met ti Police Regional Office Cordillera a ti panakaiyakar ni Tadeo ket pannusa a maitunos iti PNP Internal Disciplinary Machinery a panakaipataw ti disciplinary action kadagiti nagbiddut a pulis ken tapnu saanna nga implwensiyaan ti panakaisayangkat ti imbestigasyon.
