BAGUIO CITY – Indeklaran ni President Rodrigo Duterte ti STATE OF CALAMITY kadagiti rehion ti Cordillera, Ilocos, Cagayan Valley ken Central Luzon.
Babaen daytoy iti pinirmaanna a Proclamation No. 593 idi Martes, September 25.
Naibasar ti deklarasyon iti rekomendasyon ti National Disaster Risk Reduction and Management Council a nangadal iti epekto ti Bagyo nga Ompong kadagiti nasao a rehion.
Maipalagip a dakkel ti dadael nga imbati ti nasao a bagyo nangruna iti sektor ti agrikultura ken imprastraktura malaksid pay iti panakapukaw ti adu a pagbiagan ken biag.
Babaen iti State of Calamity ket mapapartak ti panakaipaay ti relief ken rehabilitation efforts babaen kadagiti lokal a gobyerno kadagiti maseknan a rehion.
Kagiddan ti nasao a proklamasyon ket maipatungpal ti ‘price freeze’ kadagiti kangrunaan a gagatangen ken komoditi, nainget a mabantayan dagiti presyo dagiti komoditi tapnu awan ti agidulin iti suplay, mapapartak ti panakailatang ken panakaipaluspos ti pondo para iti panakatarimaan dagiti nadadael nga imprastraktura ken agpautang ti gobyerno kadagiti apektado a sektor nga awanan ti interes.
