Baguio City–Naideklaran ti State of Calamity iti probinsya ti Benguet kalpasan ti napasaran a nepnep a nangitunda iti dakkel nga dadael iti agrikultura, imprastraktura, ken power facilities iti probinsya.
Maibasar iti Rapid Damage Assessment and Needs Analysis (RDANA) ti Benguet PDRRMC, dumanon iti P163.8 million ti pakabuklan a gatad dagiti nadadael iti agricultural crops, livestock ken poultry pakairamanan dagiti nadadael a pasilidad.
Kabayatanna, nakailista metlaeng iti nasurok P100.2 milyon a gatad dagiti nadadael iti imprastruktura pakairamanan dagiti kalkalsada, rangtay, water works system, irrigation system, ken dagiti pribado ken parapubliko a pasilidad.
Sigun iti rekomendasyon ti PDRRMC, kasapulan ti nasurok P84 million a pondo tapnu matarimaan dagiti national roads ken P13 milyon ti para iti rehabilitasyon dagiti farm to market road iti probinsya.
Maipalagip a nakailista ti 103 a landslides ken 14 road slips kadagiti nagduduma a provincial roads.
Gapu iti daytoy kinuna ni Governor Cresencio Pacalso nga agkasapulan ti gobierno ti Benguet iti nasurok P100 milliom a pondo tapno manarimaan dagiti nadadael a paset ti kalsada kas iti farm to market road iti probinsia.
