BAGUIO CITY – Naideklara ti State of Calamity iti munisipyo ti Lacub sadiay Abra babaen iti bileg ti Sangguniang Bayan Resolution No. 025, series of 2021.
Nailanad iti resolusyon a gapu pay laeng daytoy iti epekto sadiay ti mapaspasaran a habagat wenno nepnep a mangituntunda iti panagbayakabak ti napigsa a tudo.
Kinuna dagiti opisyales ti munisipyo nga idi pay July 19 a nagrugi ti panagtudona sadiay gapu iti habagat a nagresulta iti panaglupyas dagiti waig ken ti Binongan River.
Nagresulta dagitoy iti panaglayos iti sumagmamano a paset ti Lacub ken iti panakadadael dagiti imprastraktura kas iti kalsada ken kadagiti produkto ti agrikultura sadiay.
Naamuan nga agingga ita ket isolated ti Lacub kalpasan a nargaay ti paset ti Bituen, Baay-Licuan agingga iti Poblacion, Lacub Road a kakaisuna a pagnaan a pastrek ken paruar iti munisipyo.
Iti kaudian a report ti Municipal DRRM Office idi July 29, agarupen iti P12.8-M ti mapattapatta a gatad ti dadael kadagiti mula, taraken ken imprastraktura sadiay.
Maipalagip nga immunan a naideklara ti State of Calamity iti munisipyo ti Licuan-Baay sadiay Abra gapu metlaeng iti nakaro nga epekto sadiay ti manarimaan a nepnep.
