BAGUIO CITY – Mapangpanggep ti pannakaipasdek ti dua a world class facility para iti waste to energy ken mono rail transport system iti Baguio City ken iti probinsya ti Benguet.
Sigun kenni Robert John Sobrepeña, Chairman ken CEO ti Camp John Hay Development Corporation ken Chairman of the Board ti Metro Global Holding Corporation, dumanon iti agarup 100-Million US dollars wenno nasurok P5.5-Billion ti mabosbos a pondo para iti dua a proyekto tapno makatulong a masolbar iti panangimanihar iti basura ken public transportation iti Baguio City.
Ti Waste to Energy Project ket maipasdek iti agarup sangapulo nga ektarya a daga idiay Sablan, Benguet nu sadino kangrunaan nga agbenepisyo ditoy ti Baguio City, La Trinidad, Itogon, Sablan, Tuba ken Tublay wenno ti BLISTT community.
Ti nasao planta ket kabaelanna a mangpataud iti 10 Megawatts a kuryente ken mangiproseso iti nasurok 500 metric tons iti solid waste iti inaldaw ken mapagbalin daytoy kas Refuse Derived Fuel (RDF).
Innayon ni Sobrepeña, ti Waste to Energy Project ket immunan a naipresenta kadagiti mayors ti BLISTT nu sadino adda ti immunan a napirmaan a Memorandum of Understanding idi tawen 2020 nu sadino dakkel ti benepisyo a magun-od dagitoy nangruna iti sektor iti economic, social ken environmental.
Kabayatanna, ti enerhiya a mapataud wenno ma-generate ti Waste-to-Energy (WtE) Facility ket isu ti maaramat a magsupply iti kuryente iti maplanplano a pannakaipatakder ti state of the art a transportation system nga Electric Buses ken Electric Monorail system iti central business district iti Baguio City.
Sigun pay iti opisyal, dakkel ti agbalin a tulong ti Electric Monorail system a maipasdek iti walo a strategic stations nga addaan iti kaatiddog nga uppat a kilometro.
Ti walo a Monorail stations ket dumalan iti Baguio General Hospital, Camp John Hay, Department of the Interior and Local Government, Post Office idiay Session Road, Mabini St, Abanao-Magsaysay Avenue, City Hall ken Burnham Park.
Daytoy ket addaan iti pakabuklan a gatad nga agarup iti 50-Million US dollars ken mapalawa ti agbalin nga rota ti morail idiay Pacdal ken La Trinidad area.
Mangnamnama dagiti opisyal a dakkel a karit daytoy para iti mapangpanggep a proyekto a maibagbaga a maysa kadagiti kadakkelan ken most advance a ti Waste-to-Energy (WtE) Facility ti pagilyan nu sadino ket nakitaripnongdan iti local community ti Sablan, Benguet.
Agtalekda pay nga agingga nga agleppas ita a tawen ket miproseso dagiti amin a papeles ken dokyumento a kasapulan ken kidkiddawen ti Department of Natural Resources, Department of Energy ken dagiti local government units ti Baguio ken Benguet.//Bombo Jordan Tablac
