Awan pay ti nangipila iti Statement of Contributions and Expenditures (SOCE) iti siudad ti Baguio kalpasan ti maysa a lawas a panakaipatungpal ti midterm eleksyon.
Iti panakiuman ti Bombo Radyo kenni Atty. John Paul Martin, election officer iti siudad ti Baguio, kinunana a nangipaay daytoy iti notices kadagiti amin a kandidato nga agisubmitirda iti Statement of Contributions and Expenditures agingga inton Hunyo a onse iti agdama a tawen.
Sigun kenni Atty. Martin, nangipaay daytoy iti link kadagiti kandidato para iti panangidownload-da kadagiti forms para iti panag-adal ken panangfill-out-da iti daytoy.
Innayon ti election officer nga iti panangisubmitir dagiti kandidato iti Statement of Contributions and Expenditures dagitoy ket kasapulan ti soft copy ken hard copy kasta met a nasken a maipanotarized.
Nakalukat met ti opisina ti Commission on Elections Baguio manipud Lunes agingga Sabado iti oras ti alas 8:00 ti agsapa agingga alas 5:00 ti malem.
Inyunay-unay ni Atty. Martin a saan a mailaylayon ti deadline iti panangisubmitir iti Statement of Contributions and Expenditures.
Dagiti nangabak nga opisyal a saan a mangisubmitir iti SOCE ket saan a makatugaw iti posisyonda agingga nga insubmitirda daytoy.
Iti sabali a bangir, dagiti naabak a saan a mangisubmitir iti SOCE dagitoy ket maipaayan iti administrative fine wenno madiskwaliparda inton sumaruno a panagtarayda kas politiko.
