BAGUIO CITY – Rinugyanen ti Philippine Statistic Authority (PSA) – Benguet ti panakipatungpal ti Step 1 iti panagala ti National ID ditoy lokalidad babaen iti napili a lima a barangay ti Baguio City.
Sigun kenni PSA-Benguet Chief Statistical Specialist Imelda Buyuccan, nangrugin ti nasao nga addang idi pay January 18 ken agleppas inton March 31 iti agdama a tawen.
Dinakamatna a dagiti lima a barangay ket ti Irisan, Bakakeng Central, Pinget, Loakan Proper ken ti Santo Rosario Valley.
Inlawlawagna a napili dagiti nasao a barangay babaen iti impormasyon nga impaay ti City Social Welfare and Development Office ken naibasar iti bilang dagiti low income households kadagitoy.
Sigun kenkuana, sumaruno ti Step 2 a maipatungpal kadagiti nasao a barangay inton May 20.
Innayonna a manamnama met a maipatungpal ti Step 1 iti panagparehistro iti National ID kadagiti nagduduma a barangay ti Baguio inton sumaruno a bulan.
Maipalagip a ti panagala ti National ID ket maitunos iti Republict Act 11055 wenno ti Philippine Identification System Act a pinirmaan ni Presidente Rodrigo Dutere idi tawen 2018.
