BAGUIO CITY – Nakemmeg ti maysa a maibilbilang nga Street Level Individual drug personality iti buy-bust operation nga insayangkat dagiti nagduduma nga yunit ti pulisya sadiay Liwan West, Rizal, Kalinga idi kanikadua.
Nabigbig daytoy a ni Jomel Baydon Wacnang, 31-anyos ken residente ti Lacnog, Tabuk City, Kalinga.
Nakumpiskar kenkuana ti dua a pakete ti maatap a shabu nga agdagsen iti 0.06 grams ken aggatad iti P1,000 ken ti cellphone nga inaramatna iti transaksionda iti operatiba bayat a narekober iti ikotna ti naaramat a buy-bust money.
Sumangsango metten daytoy iti kaso a panaglabsing iti RA 9165 wenno iti Comprehensive Dangerous Drugs Act of 2002.
Mainaig iti daytoy, inyapela manen ni Kalinga Police Provincial Director PCol. Davy Vicente Limmong ti panangireport ti publiko iti pulisya kadagiti mapagduduaan ken patienda nga iligal nga aktibidad ken transaksion ti iligal a droga iti ayan dagitoy a lugar babaen iti panangawagda iti police hotline numbers wenno iti social media.
