Kahanga-hanga ang ipinakitang kabutihan ng isang estudyante mula sa isang paaralan sa Baguio City matapos niyang tulungan ang isang matandang lalaki na nahihirapang tumawid sa kalsada.
Habang tumatawid ang matandang may saklay sa pedestrian lane sa Harrison Road, Baguio City bandang alas-7:42 ng umaga ngayong araw, napansin ng isang estudyante ang hirap nito sa paglalakad kaya agad niya itong tinulungan.
Ayon sa estudyante, nagpasya siyang tulungan ang matanda dahil wala umano itong mapara na taxi kaya napilitan itong tumawid sa kabilang bahagi ng kalsada sa kabila ng dami ng mga sasakyan sa oras na iyon.
“Wala po kasing masakyan na taxi kaya tumawid ito,” saad ng estudyante na noon ay tila nagmamadali na ring pumasok sa paaralan.
Agad ding ipinaalam ng estudyante ang sitwasyon ng matanda sa isang pulis na naka-duty sa lugar bago siya naglakad papunta sa paaralan dahil huli na siya sa kanyang klase.
Umaksyon naman ang pulis at agad na pumara ng taxi para matulungan ang matanda.
Isang patunay ang pangyayaring ito na nananatiling buhay ang diwa ng malasakit at pagmamahal sa kapwa, lalo na sa mga nakatatanda.
