Ikonkonsidera ita ti Department of Education (DepEd) a kissayan dagiti core subjects dagiti Senior High School (SHS) curriculum ita a tawen.
Sigun kenni Education Secretary Sonny Angara, inton 2026 pay koma nga ipatungpalda daytoy ngem ikonkonsideradan ita a tawen agsipud ta adda dagiti dadduma a pagaladan a marigatan a mangisuro iti ado a subject.
Immunan nga insingasing ni Angara idi napan a tawen ti pannakakissay ti core subject dagiti Senior High School curriculum tapno mapagbalin laengen nga innem wenno pito manipud iti sigud a 17 subject.
Sigun kenni Angara, ipaay ti DepEd ti basic curriculum ken makaammon dagiti pagadalan nu adda ti kayatda nga inayon wenno idiaya nga electives subject nangruna kadagiti pribado a pagadalan.
Malaksid iti daytoy, dinakamat ti opisyal nga ipaayanda iti waya-waya dagiti estudyante nga agpili kadagiti elective subject a kayatda nga adalen kas maibasar iti interest dagitoy.
