BAGUIO CITY–Binabalaw manen ni Mayor Benjamin Magalong ti maysa pay a proyekto nga imprastraktura a maatap a substandard ditoy siydad ti Baguio.
Nadismaya ti mayor iti kabarbaro a sidewalk project iti paset ti T. Alonzo Street agsipud ta maatap a saan a nasayaat ti panakaaramidna.
Iti panangsukimat ti mayor iti nasao a proyekto, naimatanganna dagiti saan a naurnos ken nakatiwangwang a kagawaan iti nasao a lugar ken awanan pay daytoy iti umno nga signages.
Impadanon met ni City Engr. Edgar Victorio Olpindo ti nasao nga pakaseknan iti Baguio City District Engineering Office a makinsakup iti nasao nga proyekto.
Maipalagip a namingsan manen a kiniddaw ni Baguio City Mayor Benjamin Magalong iti pammalawag ti Department of Public Works and Highways Cordillera (DPWH CAR) seknan iti substandard a proyekto dagitoy iti Busol Watershed.
Kasaruno daytoy iti panangkwestunar met ti DPWH CAR kenkuana iti basaran iti akusasionna a substandard dagiti proyekto to ahensia.
Nupay kasta, impetteng ni Mayor Magalong nga ado dagiti proyekto ti nasao nga ahensya ti saan a pimmasa iti standard a kaledad dagiti proyekto ti imprastraktura.
Dinakamatna a dumanon iti 50% kadagiti proyekto dagitoy iti naisubli ken naaramid manen gapu iti saan a napintas a kaledad dagiti proyekto.
Innayunna a panawenen tapnu lukatan ti DPWH CAR ti mata ken panunut dagitoy tapnu maaramidda nga umno ti trabaho dagitoy.
Malaksid iti dayta, nagballaag pay daytoy a saanen nga urayen a daytoy ti mismo nga agwanawan kadagiti proyekto dagitoy.
Maipalagip nga inmunan a binabalaw ni Mayor Magalong dagiti proyekto ti DPWH CAR ditoy syudad gapu iti substandard a pannakaaramid dagitoy.
