Nadismaya ni First Lady Liza Araneta Marcos iti naduktalan a substandard a panakaaramid iti Philippine Film Heritage Building idiay Intramuros, Manila.
Sigun kenni Palace Press Officer Under Secretary Atty. Claire Castro, saan a nagustwan ti First Lady ti nagbanagan ti nasao a proyekto nangruna ket saan pay daytoy nalpas iti umiso a petsa a naiturn-over koman idi kalman, September 4.
Maipalagip nga idi laeng kalman ket personal a sinarungkaran wenno ininspeksyon ni Atty. Castro ken ti First Lady ti nasao a pasilidad nga addaan kadagiti sumagmamano nga issue kas iti panagtedted kadagiti bubungan ken CR, makitkita a piping, pangted nga heat insulation ken daduma pay .
Sigun met iti Department of Public Works and Highways-South Manila District Engineering Office, ti proyekto ket nai-award iti Great Pacific Builders and General Contractor, Inc. a maysa kadagiti kompanya a tagikua dagiti Discaya.
Maipalagip nga immunan a naduktalan nga adda ti pakainaigan dagitoy kadagiti maatap a naanomalyaan a flood control projects iti gobyerno nga agbalor iti minilmilyon a piso.
