BAGUIO CITY – Nadismaya ni Baguio City Mayor Benjamin Magalong iti maatap a substandard a panakaibangon dagiti pasdek iti uppat a pagadalan iti siyudad ti baguio.
Kasaruno daytoy ti panangsukimat ti mayor kenni DepeD Undersecretary Elaine Pascua kadagiti nasao a pagadalan idi kalman.
Karaman kadagiti sinukimatda ti Pines City National High School sadiay Camdas, Baguio City National Science High School sadiay Irisan ken Joaquin Smith National High School sadiay Km 4. Asin Road.
Dinellawna ti saan a de-kalidad ken saan a natibker a panakaibangon dagiti pasdek kadagiti nasao a pagadalan.
Kinunana a saan natalged kadagiti estudyante dagiti dadduma a pasdek nga inaramid ti DPWH babaen kadagiti contractor.
Innayon pay ti mayor nga agparparang a biktima iti kurapsiyon dagiti nasao a proyekto.
Kabayatanna, naladingitan met ni DepEd Undersecretary Alain Del Pascua gapu kadagiti naawatda a reklamo kontra iti DPWH ken kontraktor seknan kadagiti maatap a substandard nga proyekto-imprastraktura ti DedEd.
Naduktalanna iti isasarungkarna iti siyudad ti Baguio nga adda dagiti naipasdek a saan a natibker a pagadalan a posible a margaay iti panawen ti ginginned ken bagyo.
Karaman kadagiti naduktalanda ket dagiti maburburbor ken addaan iti bettak a datar ken pader, agub-ubo a bubong, panakaaramat dagiti substandard a materyales ken dadduma pay.
Innayona a nayuman idin ti nasao a pakaseknan iti DPWH ngem adda latta dagiti nabat-bati a problema a saan nga inaksyonan dagiti contractor.
Gapu iti daytoy, nautding a sukimaten ti lokal a gobierno ti Baguio ken DepEd ti nasao as banag tapno mapilaan iti kaso dagiti maseknan a contractor.
Impasigurado met ni Mayor Benjamin Magalong a blacklisted wenno saanen a mabalin a makipaset iti bidding kadagiti infrastructure projects iti siyudad dagiti contractors kadagiti nasao a proyekto. (-report ni Bombo Charles Nikko Limon)
