BAGUIO CITY – Naituding a mai-deport pasubli sadiay Sudan ti maysa a gangannaet bayat a naibaluden ti kadwana a Pinoy kalpasan a maatap a rinamesda ti maysa a 19-anyos a balasang ditoy siudad ti Baguio malaksid nga inalaanda pay iti ladawan ken videos ti krimen.
Nabigbig ti gangannaet a ni Mohammed Noreldyne Ahmed Osman, 26-anyos, tubo ti Sudan bayat a nabigbig ti Pinoy a kadwana a ni Verniteo Alfonso Rieza alias Noynoy, 24-anyos.
Sigun iti Baguio City Police Office, inimbitaran dagiti suspek iti balayda ti biktima ken dua a lalaki a pagayam daytoy tapnu agiinomda.
Nagturong ti biktima iti maysa a silid tapnu maturog kalpasan a nakarikna iti panakabartek.
Nupay kasta, sinurot dagiti suspek ti balasang ken sadiay a maatap a rinamesda daytoy.
Sigun iti pulisya, inalaan pay ni Osman iti ladawan ken videos ti panangramesda iti biktima.
Nangngeg met dagiti pagayam ti biktima ti panagpa-arayatna isut gapuna a simrekda iti silid ken inispalda ti biktima.
Inreportda a dagus iti pulisya ti insidente a nagresulta iti panakakemmeg dagiti suspek.
Naibalud iti Baguio City Jail ni Rieza bayat a naiturong ni Osman iti Bureau of Immigration sadiay Quezon City para iti panakapasubli daytoy sadiay Saudi Arabia.
Sumangdango dagiti dua iti kaso a panagrames ken panaglabsing iti RA 9995 wenno iti Anti-Photo and Video Voyeurism Act of 2009.
