Guyguyogoyen ti City Health Services Office (CHSO) ti publiko a makipaset iti programa para iti Suicide Prevention Month a maipatungpal inton bigat, Setyembre 23.
Iti pannakiuman ti Bombo Radyo kenni Cyra Policarpio, Registered Nurse Mental Health Assistant iti City Health Services Office, inyanunsyona a maaddaan iti parada ken launching iti immunan a nainstall a Blue Lights kadagiti overpass iti siudad ti Baguio.
Maipatungpal ti nasao parada iti alas-4 ti malem manipud idiay Convention Center paturong idiay Malcolm Square para iti ababa a programa ken launching dagiti blue lights wenno iti Project Blue.
Guyguuyogenna dagiti makipaset nga agawitda kadagiti banners ken anyaman nga IEC materials kas panangsuporta iti nasao a parada.
𝙋𝘼𝙆𝘿𝘼𝘼𝙍: 𝗔𝙙𝙙𝙖 𝙞𝙩𝙞 𝙥𝙖𝙣𝙖𝙜𝙙𝙖𝙠𝙖𝙢𝙖𝙩 𝙞𝙩𝙞 𝙨𝙪𝙞𝙘𝙞𝙙𝙚 𝙬𝙚𝙣𝙣𝙤 𝙥𝙖𝙣𝙖𝙜𝙠𝙚𝙩𝙩𝙚𝙡 𝙞𝙩𝙞 𝙗𝙪𝙠𝙤𝙙 𝙖 𝙗𝙞𝙮𝙖𝙜.
Ti Project Blue ket programa nga indauloan ni Ricky Ducas Jr., Mental Health and Substance Use Program Coordinator nangrugi idi bulan ti Mayo. Ti kayat a sawen ti Project BLUE ket Baguio’s Lifeline for Urban Emotional Wellness, maysa a suicide prevention initiative a mangbigbigbig iti koneksyon ti mental well being ti maysa nga indibidual iti emotional environment.
Nupay kasta, inlawlawag ni Policarpio a bayat a saan daytoy a maibilang kas treatment, agserbi daytoy kas tulong kadagiti makapaspasar kadagiti mental issues gapu ta naduktalan a ti nasao a kolor ket tumulong a mangipakalma.
Kasaruno daytoy iti immunan nga inwaragawag ti lokal a gobyerno ti siudad ti Baguio a kaadduan a napasamak nga suicide attempts ken indsidente ket napasamak kadagit overpass iti siudad. //kcs//
Kadagiti Ka-Bombo a makapaspasar kadagiti mental health issues, mabalin nga umasideg kadagiti mental health offices, umawag iti Baguio City Helpline babaen iti numero a 0919- 069- 6361, 911 Command Center, wenno umasideg kadagiti mapagtalkan a kapamilya wenno gagayem.
