Manarimaan ti panangraut ti Israel ti kabisera ti Yemen a Sanaa, pakairamanan ti panangpuntiriada kadagiti international aiport ti siudad, sigun kadagiti suldado ti Israel.
Iti maysa nga statement, kinuna ti Israeli military a dinadael ken rinakrak dagiti fighter jets ti Israel Defense Forces ti imprastruktura dagiti terorista a Houthi iti kangrunaan nga airport ti Sanaa a gapuanan tapno saanen nga agandar dagiti eroplano ken maaramat ti airport.
Karaman pay kadagiti nadadael ket dagiti sumagmamano a kangrunaan a power station idiay Sanaa.
Sakbay daytoy, nangipaulog ti evacuation warning dagiti suldado ti Israel iti international aiport ti Yemen idiay Sanaa.
Daytoy ti umuna a gundaway a nangipaay ti Israel Defense Forces (IDF) iti evacuation warning idiay Yemen, nasurok 1,000 miles manipod idiay Israel.
Ti panagatake dagiti kameng ti Israel Defense Forces (IDF) iti nasao a lugar ket kalpasan a simrek ti Houthi ballistic missile kadagiti air defense ti Israel ken dinadaelda ti kangrunaan nga international airport ti Tel Aviv.
Pinadas a linapda ti Israel Defense Forces dagiti missile ngem napaay dagitoy.
Maipalagip nga idi Disiembre idi napalabas a tawen, dinadael a nasayaat ti Israel ti international airport ti Sanaa a nakatayan ti agarup tallo nga indibidual ken nadangran ti tallo pulo a dadduma pay.
