BAGUIO CITY – Dagus a naipasimpa dagiti depekto a nakita dagiti opisyales ti siudad ti Baguio iti pananginspeksionda iti bypass and diversion road and bridge a nangikonektar iti Magsaysay Avenue ken Rimando-Ambiong.
Iti interview ti Bombo Radyo Baguio, inlawlawag ni Engr. Cesario Rillera, dadaulo ti Planning and Design Section ti DPWH-Baguio City District Engineering Office a dagiti nakita iti inspeksion ti grupo da Mayor Benjamin Magalong ket depekto laeng iti finishing stage wenno iti cosmetics ti proyekto.
Inlawlawagna a gapu iti panakaimuntar ti railing iti alad ti kalsada ket nabakbak bassit ti palitada iti daytoy bayat a dagiti nakusnaw ken napukaw a pintor iti kalsada ket epekto ti panagdungpar ditoy dagiti pilid dagiti lugan.
Kinuna met ni Engr. Alfredo Bannagao Jr., dadaulo ti Construction Section ti DPWH-Baguio a binilindan ti kontraktor a mangisimpa idi agsapa kadagiti nakita a depekto iti nasao a proyekto.
Inlawlawagna a saksakupen ti defects liability period ti proyekto isut gapuna a responsibilidad ti kontraktor a mangisimpa kadagiti makita a depekto iti patrabaho.
Innayonna a kiniddawda metten ti tulong ti maseknan a barangay LGU iti panakadalus ti sirok ti rangtay.
Inlawlawag pay ni Engr. Glenn Reyes, Assistant District Engineer ti DPWH-Baguio nga uray malpasen ti defects liability period ti maysa a proyekto ket adda laytta ti responsibilidad ti kontraktor a mangiwanwan iti proyekto nga inaramid daytoy.
Kabayatanna, inlawlawag metlaeng ni Engr. Rillera nga awan pay ti certificate of acceptance ti nasao a proyekto gaputa saan pay a nalpas ti makatawen a defects liability period daytoy.
Sigun kenkuana, sakbay a pirmaan ti DPWH ti nasao a sertipikasyon a maisumitir iti city government ket nasken a mangisayangkatda manen iti inspeksion iti proyekto.
Agpaso ti defects liability period ti proyekto inton sumaruno a bulan.
Kabayatanna, impasigurado ti DPWH-Baguio City District Engineering Office ti ad-adda a panangiwanawanda a naimbag kadagiti patrabaho wenno infrastructure projects a maipapaima iti ahensia.
Kasaruno daytoy ti waragawag ni Mayor Benjamin Magalong a panawenen tapnu adda ti aksion ti DPWH tapnu mapasayaat ti kalidad ti trabaho kadagiti infra projects a maipapaima iti ahensia ken agarup 50 percent kadagiti proyekto nga inaramid ti DPWH ti bimmagsak iti standards ti lokal a gobyerno ti Baguio.
Sigun kenni Engr. Rillera, babaen iti daytoy ket matungpal ti tarigagay ti mayor a de-kalidad ken napintas dagiti imprastraktura iti siudad.
Kinunana nga adda met dagiti masuksukimatda a proyekto a naipa-back job wenno naipatarimaan iti maseknan a kontraktor kas iti rehabilitasyon ti Baguio Convention Center.
Nupay kasta, imbinglayna nga awan met dagiti nagbalin a parikut kadagiti kontraktor gaputa nakasagana dagitoy a mangisimpa no adda dagiti nasken a maitarimaan iti proyekto dagitoy.
Inyunay-unayna pay a makapaspasa met iti structural integrity dagiti infra projects ditoy siudad nupay adda dagiti tumattaud a parikut iti finishing dagiti proyekto a kas iti plaster ken pintura a mababbakbak ngem maisimsimpa met dagitoy.
