Patien dagiti grupo ti agrikultura a Kilusang Mambubukid ng Pilipinas ken Amihan National Federation of Peasant Women a ti naitantan a “rollout” ti P20/kilogram rice program ket mangipakita a saan a mataginayon daytoy ken maysa a “grand deception.”
Nairuar ti nasao a banag kalpasan nga impablaak ti Department of Agriculture a ti pannakaimplementar ti programa ket naikayar iti Mayo trese tapno maipaayan ti sangapulo nga aldaw a pannakaiparit ti panaggasto ti gobierno gapu iti eleksion ita a bulan.
Sigun kenni Danilo Ramos, chairman ti Kilusang Mambubukid ng Pilipinas, nalawag a propaganda ken panangloko ti Bente Bigas Mo, ken ti pannakaitantan daytoy ket pammaneknek nga awan ti kabaelan ken awan ti panggep ti administrasion ni President Marcos Jr. nga ibaba ti presio ti bagas.
Kinuna pay dagiti nasao a grupo a ti Bente Bigas Mo program ket napaay gapu iti Rice Liberalization Law.
Gapu iti dayta, idagdagadag ti nasao a dua a grupo a maibasura ti linteg ken iyemplementar ti agrarian reform.
