BAGUIO CITY – Agtaltalinaed ti close-open status dagiti sumagmamano a kalsada kagiddan dagiti mapaspasamak a panagreggaay iti daga idiay Atok, Benguet.
Iti panakiuman ti Bombo Radyo kenni Atok Mayor Franklin Smith, nagbalin a saturated ti daga gapu iti agtultuloy a panagtudtudona rason a saan a maliklikan ti panagtinnag dagiti bato ken panagreggaay ti daga.
Nupay kasta, kinuna ni Mayor Smith nga one-lane passable ti paset ti Saddle iti nasao a munsipyo iti agdama.
Sigun kenkuana, saan a mabilang dagiti napasamak a panagreggaay ti daga iti masakupanna nu sadino dinakamatna a bambantayanda ti paset ti Sayangan, Kilometer 29, ken Kilometer 28 iti agdama.
Innayonna a karaman kadagiti bambantayan dagiti kameng iti pulisya ti kasasaad ti kalsada iti masakupan ti nasao a municipyo partikular ti nagbeddengan daytoy, Tublay, ken Buguias.
Kabayatanna, nagyaman ti Mayor iti dagos a panagresponde dagiti kameng ti Department of Public Works and Highways (DPWH) ken dagiti sumagmamano a kontraktor tapno mawaknitan dagiti kalsada a nakapasamakan iti panagreggaay ti daga.
Malaksid iti dayta, pinagyamananna metlaeng dagiti kameng ti Benguet Electric Cooperative iti dagos a panangisimpa dagitoy kadagiti linya ti kuryente a naapektaran iti panagreggaay ti daga tapno saan a nailaylayon ti panakapukaw iti kuryente kadagiti sumagmamano a lugar idiay Atok, Benguet.//Bombo Rob Dominguez
