Nadismaya dagiti sumagmamano a mammanday linteg iti maikalima nga State of the Nation Address ni President Ferdinand Marcos Jr. kalpasan a saan a nadakamat ti naisingasing a pannakaingato ti sueldo ken ti singasing a mangkissay iti value added tax.
Sigun kenni Akbayan Party List Representative Percival Cendaña, dagiti addang a dinakamat ti Presidente iti SONA ket ababa a solusion tapno marisut ti umad-adu a gastos iti taraon ken kangrunaan a tagilako.
Impeksa ti mammanday linteg a nadismaya iti saan a panangdakamat ti Presidente iti pannakaibaba ti presyo dagiti tagilako babaen iti panangkissay iti VAT a 10% manipud iti 12%.
Nupay kasta, impeksa ni Rep. Cendaña nga ituloyda nga isakad ti pannakaingato ti sueldo ken ti pannakakissay ti value added tax.
Mainaig iti dayta, dismayado metlaeng ni Senior Citizens Party List Rep. Rodolfo “Ompong” Ordanes kalpasan a saan a dinakamat ni President Marcos Jr. ti naisingasing a universal social pension para kadagiti senior Filipino.
Sigun kenni Ordanes, awan ti nalawag ken partikular a programa a nadakamat para kadagiti senior citizens.
Nupay kasta, inlawlagna a saan daytoy a pammabasol, no di ket kiddaw iti dakdakkel nga atension a para kadagiti natataengan.
