BAGUIO CITY – Napalubusan ti panaka-aramat dagiti sumagmamano a pagadalan sadiay Itogon, Benguet kas isolation units dagiti nakapatan ti COVID-19.
Sigun ken Itogon Mayor Victorio Palangdan, nakipatang da DILG-Cordillera regional director Marlo Iringan ken OCD-Cordillera regional director Albert Mogol iti DepEd-Benguet tapnu maaramat dagiti pagadalan sadiay Itogon kas temporaryo nga isolation facility ti munisipyo.
Kinunana nga impalubos ti DepEd-Benguet a maaramat ti Philex Mines Elementary School, Balatok Elementary School, Itogon Central Elementary School ken dua a pasdek ti Pacalso National High School – Main.
Nupay kasta, kinunana a kasapulanda pay nga isagana ti danum ken matarimaan dagiti banyo nga aramaten dagiti ag-isolate kadagitoy.
Impasigurado pay ni Mayor Palangdan ti kinatalged dagiti mannursuro nga agar-aramid ti modules kadagiti nasao a pagadalan gaputa naiyadayo dagitoy kadagiti napili a maaramat a pasdek.
