Impakaammo ni Atty. John Paul Martin, Commission on Elections – Baguio Election Officer dagiti sumagmamano a pagalagadan iti panangipila iti Certificate of Candidacy kas umadanin ti filling inton Oktubre a uno, iti agdama a tawen.
Iti interview ti Bombo Radyo kenkuana kinunana a tallo laeng nga indibidual ti mapalubusan a kadua ti kandidato a mangipila iti kandidaturana iti Baguio City Convention Center.
Malaksid iti dayta,kasapulan a kompleto dagiti dokumento dagitoy kas iti lima nga orihinal a kopya ti certificate of candidacy.
Adda met ti tallo a proseso ti panangipila iti kandidatura, umuna ket ti verification of the completeness ti Certificate of Candidacy, step 2 ket ti actual receiving ken ti step 3 ket ti panagpresentarda iti media law.
Gapu iti daytoy, kidkiddawen ni Atty. Martin ti kooperasyon dagiti kameng ti media iti step 3 process.
Nagpalagip met daytoy, kadagiti kandidato a kasapulan a sukimaten ken kompletuen dagitoy dagiti amin a dokumento a kasapulanda sakbayda nga agturong iti nasao a venue para iti dagus a pannakaiproseso daytoy.
Kabayatanna, kinuna ni Atty. Martin a maamuan laeng dagiti madiskwalipikar a kandidato kalpasan ti lima nga aldaw sakbay a malpas ti filling process.
Addan to met ti ipaay dagitoy a listaan dagiti certified candidacies sakbayda nga agturong idiay Metro Manila tapno isumbitir dagiti certificate of candidacy inton Oktubre nuebe.
Silulukat metlaeng dagitoy nga umawat iti reklamo kontra kadagiti nuisance party.
