BAGUIO CITY – Inlawlawag ti ama ti probinsia ti Benguet ti rason ti panakaipaisidong ti probinsia iti Modified Enhanced Community Quarantine (MECQ) agingga inton Mayo 23.
Sigun kenni Governor Melchor Diclas, agtultuloy ti panakailista ti probinsia iti nangato a kaso ti COVID-19 ken ado a pasiente ti pumuspusay nga uray dagiti awanan iti an-anayen iti salun-at.
Kinunana a dua laengen a ventilator ti nabatbati manipud iti 13 ventilator a sigud nga ar-aramaten ti Benguet General Hospital.
Dinakamat ni Governor Diclas a resulta daytoy ti nangato a bilang dagiti symptomatic a pasiente a maad-admitar iti nasao nga ospital.
Kabayatana, inlawlawagna nga agtalinaed latta a masurot dagiti pagalagadan nga impaulog ti National Inter-agency Task Force kabayatan ti MECQ iti probinsia.
Kinunana a maiparekkep dagiti tourist destinations iti probinsia ngem agtalinaed latta ti operasyon dagiti business establishments.
Nupay kasta, inlawlawagna a maipawil paylaeng ti dine-in kadagiti panganan ken agbalin laengen a take-out ti wagas ti panangipaay iti serbisyo.
Inayonna a nainget a maipatungpal ti curfew hours ken liquor ban iti uneg ti dua a lawas.
Maipatungpal latta ti tallo nga aldaw a panaglamay ken dagiti laeng asideg a kabagyan wenno kapamilya ti pimmusay ti mapalubosan nga agbantay ken dumar-ay iti lamay.
Nupay saan a maikalikagum ti health declaration ken medical certificate iti inter-municipality, mapawilan latta a rumuar dagiti agtawen iti 17 pababa ken 66-agpangato malaksid no napateg ti gagara dagitoy iti ruar.
Impanamnamana met ti opisyal a saan a maapektaran ti panangibiyahe dagiti mannalon kadagiti produktoda a nateng sadiay La Trindad Trading Post.
Impaganetgetna a nakadepende iti tunggal munisipyo no mangipaulogda iti kanayonan nga ordinansa iti masakupan dagitoy la ketdi makatulong iti panagbaba ti kaso ti COVID-19 iti probinsia ti Benguet.
