BAGUIO CITY – Irtengan pay dagiti otoridad ti kampania dagitoy kontra kadagiti komunista kalpasan ti panagrinnupak dagiti kameng ti PNP – Special Action Force (SAF) ken dagiti rebelde sadiay Mt. Kunkunig a nagbeddengan ti Patiacan, Quirino, Ilocos Sur ken Besao, Mt. Province idi napalabas a lawas.
Sigun kenni PMaj. Jerry Haduca, panakangiwati ti Mt. Province Police Provincial Office, napasamak ti insidente idi agsapa ti Sabado, February 29 kabayatan ti panagrikos dagiti Special Action Force Course Command (SAFCC) Class 93 ken 97-2018 iti nasao a lugar a paset ti operasyonda a naawagan ti Red Dawn 2.
Kinunana a ditoy a naka-engkwentro ti tropa ti gobyerno ti agarup 10 a rebelde a posible a kameng ti Kilusang Larangan Guerrilla – AMPIS.
Narekober dagiti otoridad iti nakapasamakan ti engkwentro ti maysa a M16 A1 rifle, tallo nga steel magazines ti 5.56 mm; 170 a bala ti 5.56mm a paltog, pagkabilan ti bala ken nagduduma a personal nga arwaten dagiti rebelde kabayatan ti clearing operations.
Nadiskobre pay ti tropa ti gobyerno ti maysa a kampo dagiti rebelde.
Awan ti naipadamag a nadangran iti tropa ti gobyerno.
