Impakaammo ti local government babaen ti Provincial Social Welfare Development Office idiay Apayao nga agarup 327 a pamilya wenno 966 nga indibidual ti nagbakwit gapu iti bagyo a Marce.
Manipud kadagiti nasao a bilang, 319 a pamilya kadagitoy ti agnanaed kadagiti evacuation centers bayat a walo met ti nagdagus kadagiti pagtaengan dagiti kakabagyanda.
Naireport metlaeng nga agarup dua pulo ket uppat a barangay sadiay ti naapektaran iti panagdalapus ti nasao a bagyo.
Nangipaay metten dagiti maseknan nga opisyales sadiay iti kaskenan a tulong kas iti bagas, canned goods, kape ken dadduma pay.
Kabayatanna, mabalballaagan latta dagiti dadduma a residente nga agalwad kagiddan ti bagyo.
Maidagdagadag metlaeng kadagitoy a liklikan a rumuar iti pagtaengan la ketdi saan a napateg ti aramiden ken agbalin metlaeng dagitoy a naridam kadagiti aglawlawda tapno maliklikan ti aksidente.
Impasigurado met ni Governor Elias C. Bulut Jr., a mangipaay dagitoy iti kaskenan a tulong para kadagiti naapektaran a pamilya.
