Agtultuloy ti panangguyogoy ti Department of Foreign Affairs (DFA) kadagiti Pilipino idiay Lebanon a gundawayanda ti repatriation program ti gobyerno ti Pilipinas.
Kasaruno daytoy ti panagkedked dagiti 11,000 a Pilipino a marepatriate ken kayatna nga agtalinaed iti Middle East iti baet ti agtultuloy a gubat iti nagbaetan ti Isael ken Hezbollah.
Sigun kenni DFA Undersecretary for Migrant Workers Eduardo de Vega, agar-aramid iti addang ti Embahada ti Pilipinas idiay Lebanon para iti mass repatriation iti kanito a kumaro pay ti gubat iti nasao a pagilian.
Dinakamat met ni de Vega nga awan ti Pilipino a nadangran ngem guyguyogoyen latta ti Department of Foreign Affairs dagiti Pilipino a boluntaryo nga agparepatriate nu aglukat ti flight ti Beirut inton Oktobre 10.
Sigun pay kenni De Vega, dagiti Pilipino nga agkedked nga agawid iti pagilian ket dagiti nabayagen nga agtrabtrabaho idiay Lebanon bayat a dagiti kapkapanna iti nasao a pagilian ti interesado nga agsubli iti pagilian.
Immunan nga inwaragawag ti Department of Foreign Affairs nga addan ti nasurok sangaribu a Pilipino ti nagkammang iti opisinada para iti pannakarepatriate dagitoy.
