Sumagmamano a Pilipino ti natiliw ken naibalud idiay Qatar gapu iti panangisayangkatda kadagiti mapapati a saan nga otorisado a political demonstration.
Daytoy ket kinumpirmar ti embahada ti Pilipinas idiay Qatar idi kalman.
Iti maysa a statement, kinuna ti embahada nga ammoda nga adda dagiti Pilipino a natiliw ken naibalud idi kalman gapu iti mapapati a saan nga otorisado a political demonstrations.
Nakiuman metten ti embahada kadagiti lokal nga otoridad para iti pannakaipaay ti kasapulan a consular assistance kadagiti nadakamat a Pilipino.
Immunan nga imbalakad ti embahada kadagiti Pilipino iti Arab country a raemenda dagiti linteg sadiay seknan iti mass demonstrations ken panangiyebkasda ti “political grievances” dagitoy.
Saan a nalawag nu ti political demonstrations dagitoy ket mainaig iti panagrambak ti panagkasangay ni sigud a President Rodrigo Duterte, a nakabalud ita idiay Netherlands gapu iti mapapati a reklamo nga crimes against humanity iti International Criminal Court.
