Nailatang ti 175-K a pondo para iti Undas Operation iti siudad ti Baguio para iti umadanin nga All Souls Day ken All Saints Day.
Iti panakiuman ti Bombo Radyo kenni Engr. Bonifacio Dela Peña, City Administrator iti siudad, kinunana a naglukaten dagiti sementeryo iti siudad ti Baguio idi umuna a lawas ti agdama a bulan.
Daytoy ket tapno marugianen ti panagdalus ti publiko kadagiti tanem ti ay-ayatenda iti biyag ken tapno maliklikan ti overcrowded iti uneg ti sementeryo nu dumteng ti Nobyembre a uno ken a dos a kadawyan a kaugalian dagiti Pilipino nga agturong kadagiti sementeryo.
Gapu iti daytoy, inyunay-unay ni Dela Peña iti publiko a sapsapaen dagitoy nga agdalus kadagiti tanem ti pamilyada.
Kabayatanna, saan a mailibak nga awanen ti espasyo iti Baguio City Public Cemetery rason a nasken a maipatungpal dagiti plano a high rise cemetery nu sadino dagiti bagi dagiti pimmusay ket maikarga iti urns tapno basbassit ti mausar nga espasyo.
Nu pay kasta, kasapulan a maallukoy ti publiko iti daytoy kasta met a saan daytoy a mabalin kadagiti daduma a relihiyon gapu ta maiparit ti panakauram dagiti bangkay wenno ti cremation kadagitoy.
Gapu iti dayta, ado pay a proseso ti pagdalanan ti nasao a plano ngem babaen ti multi-story, high rise ken pakaikarga iti urns dagiti bangkay ket mabalin a wagas daytoy tapno maikkat ti disparity kadagiti nababaknang ken nakukurapay a pamilya.
