Immet itan ti General Trias Police Office dagiti uppat a suspek a nairaman iti hazing incident a nagresulta iti ipupusay ti maysa a biktima sadiay Barangay Langkaan, Dasmariñas City, Cavite.
Daytoy ket kalpasan a simmukoda idi March 08, 2026.
Sigun kenni Cavite Public Information Office Chief PLt. Sara Jane Drio, personal a simmuko dagiti uppat babaen ti panangiwanwan dagiti bukodda nga abogado ken ti fraternity organization dagitoy.
Naduktalan a dua kadagiti uppat a simmuko a suspek ti nangitulod iti biktima iti ospital.
Nabigbig dagiti suspek a da John Lee Tuliao, 22; Archie Rosil, 21; Kenneth Ompod, 18; ken John Rey Torrecampo, 19.
Maipalagip a pimmusay daydi maritime student a ni Mark Kenneth Alcedo, agtawen iti 19 kalpasan a nagsagrap iti injuries kabayatan ti Tau Gamma Phi fraternity initiation rites idi March 1.
Sigun kenni Philippine National Police (PNP) Public Information Office chief Brigadier General Randulf Tuaño, siam pay a suspek ti saan paylaeng a simmuko.
Innayon ti nasao nga opisial a sumango dagiti suspek iti kaso, gapu iti panaglabsingda iti Republic Act (RA) 11053 wenno ti Anti-Hazing Law.
