Temporaryo a nagrekkep dagiti sumagmamano a transient iti siudad ti Baguio kagiddan ti mapaspasaran a kinakurang ti danum gapu pay laeng iti epekto ti El Niño.
Iti panakiuman ti Bombo Radyo kenni Precy Mangibat, maysa nga owner ti transient iti siudad ti Baguio, impeksana a daytoy ti kaunaan a gundaway manipud idi nangrugi ti negosyona idi tawen 2018 a temporaryo nga insardengna ti operasyon daytoy gapu iti kinaawan wenno limitado ti suplay ti danum.
Sigun kenni Mangibat, ado ti agpalpalista iti transientana ngem saanna daytoy nga iak-akomodar gapu ta saanna a kayat a maapektaran ti imahe ti negosyona kasta met ti turismo ti City of Pines gapu iti kinaawan ti danum.
Nangrugi idi bulan ti Abril a saanen a nag-operate ti transient ni Mangibat bayat nga impakaamona a manipud P40 a presyo ti tunggal drum ti danum a maideliver ket nagbalinen daytoy a P70 tunggal drum.
Kinuna ni Mangibat nga impadasna met ti agpadeliver no pay kasta, agbalbalin a karit ti panakaideliver daytoy gapu ta pila-pila ti agpadeliver ti danum ken dumanon iti dua a lawas sakbay a maideliver ti order dagitoy.
Agbalbalin pay a maysa a karit ti lokasyon dagitoy gapu ta addada iti nangato nga elevation a paset ti Baguio partikular iti San Carlos Heights.
Innayon ni Mangibat nga iti laksid a temporaryo a nagsardeng ti negosyo daytoy ket agtultuloy ladta met ti panagbayadna kadagiti nasken a mabayadan iti munisipyo.
No pay kasta, impeksana a maawatanna ti rason no apay nga agkurkurang ti danum iti siudad ti Baguio gapu iti epekto ti El Niño.
Kabayatanna, mangnamnama met dagitoy nga agtudo tapno adda ti danum a mausar dagitoy.//M
