BAGUIO CITY – Nadiskobre dagiti otoridad ti naabandona a kampo ti rebelde a New People’s Army (NPA) ken sumagmamano a war materials ken pampabettak sadiay Barangay Bagumbayan, Tabuk City, Kalinga idi kalman.
Maibasar iti report ti Kalinga Police Provincial Office, insayangkatda ti Oplan Eagle Spear 2022 kalpasan a nakaawatda ti impormasyon manipud kadagiti maseknan a residente.
Nailanad pay iti report a malaksid iti nadiskobre a kampo dagiti rebelde ket nasarakan ken kinumpiskar dagiti otoridad ti lima a 40 mm cartridge; innem a grenade rifles; 19 a pidaso ti electrical blasting caps; dua a dynamite gel; electrical wire ken dua a detonator battery pack.
Nasarakan metlaeng ti sumagmamano a subversive documents ken personal belongings dagiti rebelde.
Dinadael dagiti otoridad ti nadiskobre a kampo dagiti NPA.
Manamnama pay ti ad-adda a panagkapoy ti firearms capabilities ti rebelde a grupo iti panakakumpiskar dagiti war materiels dagitoy.
