Kidkiddawen ita ti sumagmamano a women’s group ti disciplinary action a maipataw kenni Quezon City Rep. Bong Suntay kalpasan iti sexually suggestive remark na kenni Anne Curtis kabayatan iti House hearing iti impeachment case ni Vice President Sara Duterte idi kalman.
Karaman metlaeng kadagiti nangbatikos kenni Representative Suntay ket ti kakadua daytoy iti Kongreso pakairamanan ni Representative Ysabel Maria Zamora a mangibagbaga a maikat daytoy iti kongreso.
Sigun iti Philippine Commission on Women (PCW), kasapulan a mangiruwar ni Suntay ti “unqualified apology” ken sungbatanna ti panangdadael nga innaramidna.
Idagdagadag ti nasao a komisyon ti House Ethics Committee a mangisayangkat ti kaskenan nga aksyon maibasar iti Republic Act 6713 wenno Code of Conduct.
Binabalaw met ti Gabriela Women’s Party ti innaramid ti kongresista. Sigun iti nasao a grupo, saan a nasayaat ti innaramid daytoy kas mammanday-linteg. Insingasing daytoy a mapatawan ti opisyal ti kaskenan a pannusa maibasar iti Quezon City Bawal Bastos Ordinance ken RA 11313 wenno ti Safe Spaces Act. //BomboKCS
