BAGUIO CITY – Makapasar iti power interruption ita nga aldaw dagiti 20 a babbarangay ditoy siudad ti Baguio ken probinsia ti Benguet gapu iti panakasukat dagiti marunrunot a poste ti Benguet Electric Cooperative.
Sigun iti kooperatiba, mapasaran daytoy iti alas nuebe ita nga agsapa agingga inton alas singko ti malem.
Mapukawan iti suplay ti kuryente dagiti barangay ti Poblacion Central, Pongayan, Gaswiling, Sagubo, Gadang ken iti paset ti Cayapes sadiay munisipyo ti Kapangan bayat nga iti entero a munisipyo ti Bakun malaksid laeng iti Kapaya Proper.
Mapasaran pay ti power interruption iti Eagle Crest Subdvision Phase 3 ken iti Middle Quezon Hill ditoy siudad ti Baguio bayat nga iti munisipyo ti Buguias, Benguet ket iti barangay ti Baculongan Sur, Sebang ken Catlubong.
Kidkiddawen met ti Beneco ti panaka-awat dagiti konsyumer gaputa ti aramidenda ket para iti panakapabaro dagiti marunrunot a poste tapnu saan a madadael wenno matumba no napigsa ti bagyo wenno angin.
