BAGUIO CITY – Ipalpalagip manen ti Provincial Health Office ti Benguet ti kanayon a panagdalus dagiti umili iti aglawlaw dagitoy tapnu makaliklikda iti dengue virus.
Sigun kenni Dr. Maria Imelda Ulep, Provincial District Hospital Coordinator ken Incident Management Team Commander nga adda dagiti immuna a nagpositibo iti COVID-19 a naaddaan ti dengue fever a nailistada ti Benguet General Hospital.
Dinakamatna nga iti kaudian a datus ti nasao nga ospital idi napalabas a bulan ti Agosto ket 9 manipud kadagiti 109 a COVID-19 patients ti naaddaan ti dengue fever.
Gapu iti daytoy, inyunay-unayna manen ti panangipatungpal dagiti umili kadagiti wagas kontra iti dengue fever.
Inyulitna a karaman kadagitoy ti panagbiruk ken panagdadael kadagiti mabalin a pag-itlogan dagiti lamok, ti panagsuot iti atiddog a bado, ti dagus wenno nasapa a panagpakonsulta no makarikna kadagiti sintomas ken ti panangisayangkat ti fogging wenno spraying kadagiti hotspot areas ti dengue.
Impalagipna pay ti linawas a panangisayangkat ti clean-up drive kadagiti babbarangay a nasken a pagtitinulongan dagiti umili.
