Inaklon ni sigud a President Duterte a sumagmamano kadagiti indibidual a karaman iti iligal a droga ket naibelleng iti baybay.
Sigun kenkuana, para laeng iti 40 agingga 50 a balud ti rumbeng nga adda kadagiti kulungan ngem nagbalin dagitoy nga overcrowded no sadino dimmanon daytoy iti 80 agingga 100 a balud rason a napagdesisyonanna nga ibelleng dagitoy tapno lumawa dagiti pagbaludan.
Gapu iti dayta, kinunana nga inkargana dagiti natiliw a drug lord iti bangka ken ginalutanna dagiti ima ken saka dagitoy sakbayna nga imbelleng iti baybay.
Kabayatanna, impeksa pay ti sigud a presidente nga ibetenna ti bukodna a bagi iti sangwanan ti publiko no mapaneknekan a karaman daytoy iti iligal a transaksyon ti droga iti pagilian.
Innayonna metlaeng a no adda ti maysa a pudpudno ket agresign daytoy karaman dagiti pamilyana.
