BAGUIO CITY – Nakasaganan ti ‘traffic re-routing scheme’ nga ipatungpal ti Traffic Enforcement Unit (TEU) ti Baguio City Police Office (BCPO) iti maangay a highlight events ti Panagbenga partikular ti Grand Street Dance ket Grand Float Parade inton Pebrero 25 ken 26.
Sigun kenni PSupt. Armando Gapuz, dadaulo ti TEU-BCPO, nakikoordinardan kadagiti nagduduma a transport group babaen iti naangay a Conference Coordinating dagitoy nga indaulwan ti BCPO para iti information dissemination iti temporaryo a traffic scheme nga epektibo iti dua nga aldaw.
Kinunana nga iti oras ti alas sais ti agsapa ket mairikep dagiti kalsada a dumalanan ti parada ken manamnama a mailukat met laeng dagitoy iti ala-una ti malem.
Agrugi ti parada iti Panagbenga Park paturong iti Session Road, Magsaysay Road, Harisson Road agingga iti Melvin Jones Football Grounds.
Nangituding met dagitoy iti temporaryo a loading ken unloading zone ken staging area para kadagiti parapubliko a lugan a saan a mapalubusan a sumrek iti Cental Business District.
Innayonna a nasken a suruten dagiti drivers ti “pick and go” ken “drop and go” scheme tapnu maliklikan ti nailet a taray ti trapiko iti nasao nga aldaw.
