BAGUIO CITY – Agtultuloy ti clearing operations dagiti soldado sadiay Barangay Mallig ken Sitio Tawini, Barangay Upper Atok, Flora, Apayao kalpasan ti nagsina ken nagsaruno nga engkwentro iti nagbaetan dagiti kameng ti 17th Infantry Battalion (17IB), Philippine Army ken dagiti kameng ti Communist Party of the Philippines-New People’s Army (CPP-NPA) idi kalman.
Immuna iti daytoy, nagresponde dagiti soldado sadiay Barangay Mallig kalpasan a nakaawatda ti impormasyon manipud kadagiti umili sadiay seknan iti panagkikil dagiti rebelde iti lugarda ken iti panagala dagitoy kadagiti taraonda.
Manarimaan ti security operations dagiti soldado idi pinalpaltogan dagitoy ti dumanon 20 a kameng ti West Front, Komiteng Probinsya ng Cagayan, Komiteng Rehiyon Cagayan Valley ti CPP-NPA ken pimmaut ti engkwentro iti 15 a minutos.
Nupay kasta, nagsanod dagiti rebelde ken kabayatan ti clearing operations ket nakita ti militar dagiti dara manipud iti pwesto dagiti rebelde.
Simmaruno a nakaranget dagiti soldado dagiti rebelde sadiay Sitio Tawini, Barangay Upper Atok iti uneg ti agarup nasurok 30 a minutos sakbay a nagsanod manen dagiti rebelde.
Kabayatan ti clearing operation ket nakumpiskar dagiti soldado ti uppat nga M-16 rifles, sumagmamano a pampabettak, kagawaan para iti medikal, sumagmamano a subersibo a dokumento, bagpacks ken nagduduma a personal a kagawaan.
Awan met ti nadangran kadagiti soldado bayat a mapapati nga adu ti nadangran kadagiti rebelde.
Naamuan a naideklara a persona non grata dagiti CPP-NPA sadiay Flora, Apayao.
Pinagyamanan met da MGen. Laurence Mina, commander ti 5th Infantry Division, Philippine Army ken Lt.Col. Angelo Saguiguit, commanding officer ti 17IB ti panangireport dagiti umili iti presensia dagiti rebelde iti lugar dagitoy.
Kinuna ni MGen. Mina a mandato dagiti soldado a mangsalwad kadagiti umili ken maaramid laeng daytoy babaen iti epektibo a panakibinnadang dagiti umili.
Al-allukuyenna met dagiti miembro ti CPP-NPA iti panagsukoda iti gobyerno nangruna ta awanen ti pagturongan ti grupo gapu iti ad-adda a nairtengan a panagbinnadang ken panagkaykaysa ita dagiti umili ken ti militar.
Innayonna a silulukat dagiti parapubliko nga ospital kadagiti nadangran a rebelde kadagiti nasao nga engkwentro tapnu agpatamingda para iti napintas a panaka-agasda ken matulonganda iti napartak a panagimbagda. (with reports from Seventeendoordiebattalion and 5ID Startroopers, Philippine Army)
