BAGUIO CITY- Agtultuloy ti panagsagana ken panagsanay dagiti athleta ti Philippine Athletics Track and Field Association (PATAFA) para iti throwing events ditoy Baguio City.
Iti interview ti Bombo Radyo Baguio ken Philippine Athletics Track and Field Association (PATAFA) Coach Arniel Ferrera, kinunana naksayan dagiti atleta nga agsansanay ita ditoy syudad kalpasan a nagsubli ken naipalubos iti training bubble kadagiti jumpers ken sprinters sadiay Ultra, Pasig City.
Kabayatanna, nagtalinaed met ken manarimaan latta ti panagsanay dagiti atleta iti long distance ken throwers ditoy syudad pakairamanan dagiti myembro ti National Team.
Nupay kasta, kinunana nga arigna a 90% a nakasagana ita dagiti atleta para iti umadani a South East Asian Games wenno SEA GAMES inton May 2022 sadiay Hanoi, Vietnam.
Mainaig iti dayta, imbinsana a dakkel ti adjustment dagitoy iti panagsanayda gapu iti agdama a pandemya.
Inaklonna a narigat iti panagsanayda kagiddan iti pannakaipatungpal dagiti nagduduma a restriction ti COIVD-19.
Iti baet ti daytoy, pinagyamananna ti suporta nga ipapaay ti Philippine Sports Commission ken PATAFA para iti in-inot nga development ti performance dagiti atleta nangruna iti physical ken mental performance dagitoy.
Inayunna a dakkel a tulong a napili ti siudad a pakaangayan ti panagsanay dagitoy nangruna ta naipaayanda iti komportable nga akomodasyon ken umdas a taraon nga ad-adda a mangtultulong kadagitoy para iti napintas ken nainget a panagsanay.
