BAGUIO CITY – Adda latta dagiti indibidual nga agpangpanggep a sumrek ditoy siudad ti Baguio uray awan ti napateg a gagara dagitoy.
Sigun kenni Police Major Eddie Bagto, dadaulo ti Baguio City Police Office – Station 9, iti ipatpatungpalda a checkpoint iti masakupanda ket adda dagiti tattao a saanda a palpalubusan a makastrek ditoy siudad.
Kinunana a dagitoy dagiti indibidual a kayatda laeng nga agpasiar ditoy siudad ken awan ti maibagada a napateg nga aramidenda.
Innayonna nga adda ti 12 a tattao a pinasubli dagitoy.
Nupay kasta, kinunana nga inlawlawagda met a naimbag a nasken a nainget a maipatungpal ti enhanced community quarantine.
Kabayatanna, kinuna pay ni Bagto nga adda latta met dagiti indibidual a matiltiliwan nga aglablabsing iti curfew ditoy Baguio nangruna kadagiti nasulinek a paset dagiti babbarangay.
