BAGUIO CITY – Idonar dagiti opisyales ti Kalinga ti sweldo dagitoy para iti kampanya ti COVID-19 Inter-Agency Task Force ti probinsia tapnu mapagtalinaed ti negatibo a kaso ti COVID-19 sadiay.
Idonar da Kalinga Vice Governor Atty. Dave Odiem ken PCL-Kalinga President Jay Harley Duguiang ti makabulan a sweldoda para iti nasao a kampanya.
Kagudua met iti makabulan a sweldoda ti idonar da Board Members atty. Shirlynne Dasayon-Alunday, Emilio Kitongan, Atty. Christian Pic-it ken Roger Saga-oc, pakairamanan ni Indigenous Peoples Mandatory Representative Michael Karel Sugguiyao.
Kabayatanna, ginatang ti grupo dagiti 12 a pribado nga umili ti Kalinga a nabigbig iti ‘KaraBaSa Group’ wenno Karamay ng Bayan Sa Aksyon COVID-19 ti 15,000 a kilo ti kalabasa manipud sadiay Pudtol, Apayao.
Naiwaras dagitoy, kadwa ti kanayonan a 2,000 a kilo nga indonar ti suplayer kadagiti babbarangay ti Sucbot, Balong, Dilag, Cabaruan, Laya West ken Laya East, Dagupan West, Casigayan ken sumagmamano a paset ti San Juan ken Ubbog.
Sigun iti KaraBaSa Group, saan a nalaka a malungtot dagiti kalabasa no idilig iti dadduma a bulbulong a nateng, eco-friendly gaputa saanen a kasapulan a mabalkot ken napumpunno pay iti nutrisyon
