BAGUIO CITY – Naipa-sublease wenno naipa-abang iti sabali nga exhibitor ti sumagmamano kadagiti stalls iti Baguio Blooms Exhibition and Exposition sadiay Lake Drive, Burnham Park.
Sigun kenni Mabel Chagwaten, ti nangabak a bidder iti nasao a trade fair, impa-abang dagiti maseknan nga exhibitor ti stalls dagitoy iti sabali nga indibidual iti nangatngato a gatad.
Kinunana nga idi paylaeng damo ket addan ti namonitorna a nagpa-sublease wenno nagpa-abang iti sabali ngem saanna nga inkaskaso gaputa dagitoy ket inrekomendar dagiti empleyado wenno opisyales iti lokal a gobyerno ti Baguio.
Imbingayna a naduktalanna ti panakaipaabang dagiti nasao nga stalls gaputa naiduma dagiti mailaklako kadagiti nasao a pwesto manipud iti nasao a section ti trade fair.
Impalawagna nga adda ti zoning iti nasao a market encounter kas iti food section, ti section a pakailakuan met dagiti produkto manipud iti siudad ti Baguio wenno rehion Cordillera ken ti section a pakailakuan met dagiti produkto manipud iti dadduma a rehion iti pagilian.
Kinunana a nairaman met iti blacklist dagiti exhibitor a nagpa-sublease isut gapuna a saanen dagitoy a mabalin a maka-ala ti pwesto iti market encounter iti sumarsaruno a tawen.
Naamuan nga iti orientation dagiti exhibitors ket tallo nga indidbidual ti nakitada a nagpa-sublease ngem maysa laeng ti saanen a napalubosan a naglako.
Aggatad met iti P75,000 ti abang iti tunggal stall malaksid pay iti P16,000 para iti miscellaneous fees kas iti ti BIR, special permit, electric bii ken security deposit a mabalin a masubli kalpasan ti market encounter.
