BAGUIO CITY – Mapaspasaran ita ti atiddog a pila kadagiti sanga ti Land Bank of the Philippines gapu kadagiti 4Ps beneficiaries a mangipabpabaro iti cash cards dagitoy.
Inlawlawag ni Department of social Welfare and Development – Cordillera Regional Director Janet Armas nga adda iti pammilin manipud iti DSWD – Central Office para iti panaka-upgrade ti cash card dagiti benepisyaryo.
Kinunana nga iti siudad ti Baguio a naisayangkat ti pilot testing ti nasurok 2,000 a cash card ken agbalin daytoy nga EMV Card wenno smart cards.
Dinakamatna a sumagmamano kadagiti 4Ps beneficiaries ti agrekreklamo gaputa dumanon pay iti rabii ti pila kadagiti sanga ti Land Bank.
Impanamnama met ti DSWD-Cordillera ti panakitaripnongda iti nasao a bangko tapno maadal met laeng dagitoy no kasano pay a mapapartak ken mapapintas ti panangipaay dagitoy ti cash card.
Innayonna nga ita a bulan ti Mayo ket puntiryada a maipaayan iti cash card dagiti 61,000 a bebeficiaries ti nasao a programa ditoy rehiyon.
