Maur-uray paylaeng no anya ti sumaruno nga addang nga ipatungpal ti gobyerno kalpasan ti panagleppas ti consolidation dagiti jeepney drivers ken operators kas paset ti Public Utility Vehicle Modernization Program.
Iti panakiuman ti Bombo Radyo kenni Wilson Bumay-et Jr., Jeepney Federation President ti Baguio ken Benguet, kinunana nga agarup 4% agingga 5% ti saan pay a nakapagconsolidate iti probinsya ti Benguet ken siudad ti Baguio kasaruno ti panakabigbig dagiti ruta dagitoy.
Sigun kenni Bumay-et Jr., ti rason no apay a saan a nakapagconsolidate dagiti sumagmamano a draybers ken operators ket gapu ta saanda nga umanamong iti daytoy ken agparparang a napilitan laeng dagitoy a nagpaconsolidate.
Nupay kasta, kinunana a normal paylaeng ti byahe dagiti jeepneys ken awan pay ti order a naipayulog a saan nga agbiyahe dagiti saan a nakapagconsolidate.
Gapu iti dayta, kiddaw ti presidente iti nasao a federation kadagiti Land Transportation Officer a saanda nga agresibo nga agtiliw gapu ta adda ti legal a proseso a rumbeng a suruten dagitoy.
Kabayatanna, impeksa ni Bumay-et Jr. ti rumbeng a panangmintinir iti kinadalus dagiti staging area wenno loading ken unloading area.
Nagpalagip met daytoy kadagiti draybers a liklikanda ti panagbalin a darasudos iti panagbyaheda.
Impakaammona met a kanayon a silulukat ti federation dagitoy a mangtulong kadagiti draybers ken operators a mangkasapulan iti tulong.//Bombo Mera Pacpacan
