BAGUIO CITY – Manamnama a ngumato ti tourist arrival iti Mt. Pulag sadiay Kabayan, Benguet kasaruno ti panakailukat manen ti tapaw a paset daytoy kadagiti hikers ken campers kalpasan a nauram, tallo a bulan ti napalabas.
Sigun kenni Mt. Pulag Protected Area Superintendent Victor Gorinto, nailukaten ti Akiki-Tawangan Trail ken ti summit ti bantay.
Kinunana a nagreklamo ti grupo dagiti tour guides ken negosyante sadiay gapu iti bassit a bilang dagiti turista a sumangsang-at iti bantay manipud nairikep ti ngato a paset daytoy.
Gapu iti daytoy, nangipaulog iti pammilin ni Kabayan Mayor Gideon Todiano para iti dagus a panakailukat ti Akiki Trail.
Nupay kasta, nakaawatda met iti surat manipud kenni DENR-Cordillera Regional Director Ralph Pablo a mangibilbilin iti panakairekep manen ti paset ti bantay.
Gapu iti daytoy, naituding nga agpapatang dagiti opisial ti Kabayan ken ti DENR-Codillera tapnu pagnunumuan dagitoy ti kasasaad ti nasao bantay ken no mairekomendar ti naan-anay a panakailukat Mt. Pulag.
Maipalagip nga idi Enero 20 ket temporaryo a nairikep ti ngato a paset ti bantay kalpasan ti panaka-uram ti innem nga ektarya a paset ti bantay a maatap nga intunda ti nagbettak a portable stove ti maysa a grupo dagiti campers manipud cebu.
Kabayatanna, dinakamat ni Gorinto nga iti agdama ket manarimaan paylaeng ti panagtubo dagiti ruot ken dwarf bamboos iti nauram a paset ti summit ken regular daytoy a wanwanawanan ti opisinada.
Kinunana a gapu iti daytoy ket kinabilanda iti cordon ti nasao a disso ken mabalbalakadan dagiti hikers tapnu ti laeng trail ti suruten dagitoy tapnu saan a madisturbo ti panagtubo dagiti ruot ken kawayan iti grassland.
Innayonna pay nga imbes nga agluto sadiay dagiti campers ken hikers ibalbalakadda ti panangitugot laengen dagitoy iti packed lunch ken ready-to-eat meals.
Naituding met nga ipaulog paylaeng ti DENR ti baro a polisiya iti panagaramat ti stoves kadagiti campsites iti rehion.
