BAGUIO CITY – Maad-adal itan ti sungbat ni Abra Governor Joy Bernos seknan iti alegasion a naglabsing daytoy iti paglintegan ti enhanced community quarantine.
Immuna iti daytoy ket naipaayan ni Bernos ken ti dua pay a gobernador ditoy pagilian iti show cause order gapu iti maatap a panaglabsing dagitoy iti ECQ.
Iti interbyu ti Bombo Radyo kenni Department of the Interior and Local Government (DILG)-Cordillera Regional Director Marlo Iringan, kinunana a nangipaayen iti sungbat ni Bernos seknan iti nasao a banag.
Kinunana a naisumitiren ti pammalawag ti gobernadora iti central office ti DILG.
Innayonna nga ad-adalen itan ti legal services office ti DILG ti sungbat ni Bernos iti show cause order.
Kabayatanna, inaklon ti regional director nga agtultuloy a makaw-awata ti DILG iti adu a reklamo dagiti residente kontra kadagiti opisial dagiti lokal a gobierno seknan iti pannakaipaay ti tulong ita nga ECQ.
Impanamnamana nga ak-aksionan ti DILG dagiti reklamo ngem kiniddawna ti pannakaawat dagiti umili.
Inlawlawag ni Iringan a limitado laeng ti pondo ken kabaelan dagiti lokal a gobierno isut gapuna a saan a maipaay ti amin a kiddaw dagiti umili ita a panawen ti krisis.
